21:00 чаастааҕы иһитиннэриини көрүҥ.
АО «Саханефтегазсбыт»Дьокуускайга АИ-92, АИ-95 уонна дизтопливо. Харчынан уонна каартанан. Биир тырааныспарга 20 л диэри сапыраапкалыыллар. Аадырыстара: А-С № 1: Михаил Николаев проспега, 19/1а А-С № 6: Жатай, суол быһа охсуһуута, 1 А-С № 1401 ОПТИ: Маҕан, суол быһа охсуһуута, 1 А-С № 51: 50 лет Советской Армии, 49б А-С № 62: Хатыҥ Үрэх, 4 км, 8а АО НК «Туймаада-Нефть» Болҕомтобутун уурабыт. АИ-92, АИ-95 А-С ситимнэригэр сарсыҕҕыттан сөргүтүллэр. Дизтопливо: А-С ситимнэригэр хааччаҕа суох. ООО «СибОйл» Болҕомтобутун уурабыт: бэнсиин кээмэйэ хааччахтаах -а наличный и безналичный расчёт, до 20 литров на транспортное средство: АИ-95: А-С, Очиченко уул., 6 (саҥа аадырыс) АИ-95: А-С, Бүлүүлүүр суол, 6/1 АИ-95: А-С, Окружной шоссе, 4 км АИ-95: А-С, Окружной суол, 4/2я АИ-95: А-С, Покровскайдыыр суол, 4 км (сарсыҥҥыттан сөргүтүллэр) АИ-92: А-С, Покровскайга ООО «Сервис Ойл» АИ-92: Покровскайдыыр суол, 5 км, 2Б (сарсыҥҥыттан сөргүтүллэр) Суһал ыстаап |
ВЭФ-2026 чэрчитинэн Владимир Путиҥҥа Уһук Илин сайдыытын түмүктэрин интерактивнай презентациятын билиһиннэрдилэр.
РФ Бырабыыталыстыбатын Бэрэссэдээтэлин солбуйааччы — дойду Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев, Уһук Илини уонна Арктиканы сайыннарыыга министр Алексей Чекунков дакылааттары оҥордулар.
Уһук Илин сүрүн экэнэмиичэскэй көрдөрүүлэрэ Арассыыйа орто таһымыттан үрдээбиттэрэ бэлиэтэннэ. Сүрүн капиталга инвестиция 469% улааппыт, ити эрэгийиэннэр орто көрдөрүүлэрин 1,5 төгүл куоһарбыт. Промышленнай производство 330% эбиллибит, тутуу үлэтин кээмэйэ 1,5 төгүл улааппыт.
2015 сылтан Уһук Илиҥҥэ 6,8 трлн солк. чааһынай инвестиция тардыллыбыт. 1,1 тыһыынчаттан тахса тэрилтэ тутуллан үлэҕэ киирбит, 191 тыһ.үлэ миэстэтэ тэриллибит.
2023 сылтан айылҕа гааһын переработкалааһын кээмэйэ 24 млрд. 40 млрд куб.м кэриҥэ улааппыт. Саҥа тэрилтэлэр тутуллубуттар: Амурдааҕы гаһы переработкалыыр комплекс, Находкинскайдааҕы минеральнай уоҕурдуулар собуоттара, уо.д.а.
Муора портарын кыамтата улааппыт. Иккис Северомуйскай тоннель тутуута саҕаламмыт. «-везда» суудунаны тутар комплекс тэриллибит, «Восточная верфь» суудунаны өрөмүөннүүр собуот, ону таһынан атын тэрилтэлэр тутуллубуттар.
Курил арыыларыгар туристическай маршруттар уонна инфраструктура сайдаллар. Туризмы өйүүргэ «Дальний Восток — земля приключений» куонкурус, «Тропы Дальнего Востока» федеральнай бырайыак тэриллибиттэр. Уһук Илиҥҥэ микроэлектроникаҕа икки саҥа собуот тутуллар, Нуучча арыытыгар инновационнай научнай-технологическай киин тэрийэллэр. «Патриотическай» ТОР тэриллибит. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/62442
|
Ил Дархан Айсен Николаев Өлүөхүмэ оройуонугар үлэтинэн тиийэ сылдьан, РФ Дьоруойа Виктор Софронов дьиэ кэргэнигэр сырытта.
Көрсүһүүгэ байыаннай сулууспалаах бэйэтэ, кэргэнэ, уола, төрөппүттэрэ Галина Нагимовна уонна Андрей Викторович уонна Дьоруой эдьиийэ кыттыыны ыллылар.
Истиҥ көрсүһүү буолла. Айсен Николаев Виктор Софроновы уонна кини чугас дьонун кытта кэпсэттэ. Дьиэ кэргэн олоҕун-дьаһаҕын ыйыталаста уонна байыаннай сулууспалаах төрөппүттэригэр үтүө санаалаах киһини иитэн таһаарбыттарыгар махтанна.
—Эһиги дьиҥнээх Дьоруойу, эр санаалаах, Саха сирин дьоһун киһитин иитэн таһаарбыккыт. Өрөспүүбүлүкэ бары олохтоохторун ааттарыттан эһиэхэ уолгут, кини тулуурдаах, хорсун быһыытын, төрөөбүт дойдутугар бэриниилээҕин иһин махтанабын. Биһиги Викторынан уонна кини хорсун быһыытынан киэн туттабыт, — диэтэ Айсен Николаев.
Виктор Софронов сулууспатын, кини аймахтарын уонна бөһүөлэк олоҕун туһунан кэпсэттилэр. Төрөппүттэрэ 2022 сылтан уолларыттан иһитиннэриини хайдахтаах күүппүттэрин, кинини кытта сибээһи куруук туппуттарын кэпсээтилэр. Байыаннай сулууспалаах бэйэтэ чугас дьонун долгуппат буоларга кыһаллыбыт уонна барыта этэҥҥэ диэн биллэрэ сылдьыбыт.
Кэпсэтии кэмигэр, бөһүөлэк олохтоохторун долгутар боппуруостар эмиэ таарылыннылар. Чуолаан, кыһыҥҥы кэмҥэ хочуолунай үлэтин уонна гаас боппуруоһун туһунан кэпсэтии барда. Өрөспүүбүлүкэ баһылыга билиҥҥи балаһыанньаны чуолкайдаата уонна олохтоохтору итиинэн туруктаахтык хааччыйыы наадатын бэлиэтээтэ.
—Биһиги сорукпут — байыастарбыт дьиэ кэргэттэригэр чугас буолуу, тугу көмөлөһөр кыахтаахпытын билии уонна үөскүүр боппуруостары суһаллык быһаарыы. Маннык өйөбүл тиһиктээх буолуохтаах, — диэн эрэгийиэн салайааччыта тоһоҕолоон бэлиэтээтэ.
Виктор Софронов 1991 сыллаахха тохсунньу 29 күнүгэр Өлүөхүмэҕэ, Нефтебаза бөһүөлэгэр, дьиэ кэргэҥҥэ үһүс оҕонон төрөөбүт. 3 №-дээх орто оскуолаҕа үөрэммит, оскуола олоҕор көхтөөхтүк кыттыбыт, успуордунан дьарыктаммыт. Тохсус кылаас кэнниттэн Өлүөхүмэтээҕи техникумҥа үөрэнэ киирбит, онно механик идэтин ылбыт. Онтон Арассыыйа аармыйатыгар суһал сулууспаны ааспыт, демобилизация кэнниттэн дойдутугар кэлэн баран Өлүөхүмэ нефтебаазатыгар суоппардаабыт. 2022 сыл балаҕан ыйыгар мобилизацияланан байыаннай дьайыыга барбыт.
Аймахтара Виктор барыаҕыттан хайдах долгуйбуттарын, киниттэн куруук иһитиннэрии кэтэһэллэрин кэпсээбиттэр. Кинилэр этэллэринэн, байыаннай сулууспалаах бэйэтэ чугас дьонун долгуппат туһугар кыһаллыбыт уонна үксүгэр кылгастык: «Барыта этэҥҥэ, үлэлиибин», — диэн биллэрэр эбит.
Бойобуой соруктары толорууга көрдөрбүт хорсун-хоодуот быһыытын иһин РФ Бэрэсидьиэнин Ыйааҕынан Виктор Софроновка Арассыыйа Дьоруойун аата иҥэриллибитэ.
Арассыыйа Дьоруойун олоҕор дьиэ кэргэн ураты миэстэни ылар. Кинилэр уоллаахтар. Чугас дьонноро Виктор аймахтарын мэлдьи өйүүрүн, төрөппүттэригэр хаһаайыстыбаҕа көмөлөһөрүн уонна дьиэ кэргэнигэр болҕомтолооҕун бэлиэтииллэр.
Көрсүһүү түмүгэр Айсен Николаев Виктор Софроновка дойдутугар бэриниилээх сулууспатын, хорсун быһыытын иһин, төрөппүттэригэр уонна чугас дьонноругар байыаннай сулууспалаахха өйөбүллэрин иһин өссө төгүл махтанна. Ил Дархан дьиэ кэргэҥҥэ чэгиэн доруобуйаны, этэҥҥэ буолууну уонна туох баар үтүөнү баҕарда. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии:
https://www.sakha.gov.ru/news/62488
Хаартыскаҕа Анна Белоусова түһэриитэ
|
Владимир Путин Уһук Илиҥҥэ үһүс оҕо төрөөтөҕүнэ бэриллэр үрдэтиллибит төлөбүрү 2030 сылга диэри уһатарга этии киллэрдэ. Арассыыйа бэрэсидьиэнэ Владимир Путин Илиҥҥи экэнэмиичэскэй пуорум XI пленарнай мунньаҕар Уһук Илини салгыы сайыннарыыга саҥа соруктары туруорда. Чуолаан, дойду баһылыга Уһук Илин эрэгийиэннэригэр үһүс оҕо төрөөтөҕүнэ бэриллэр үрдэтиллибит төлөбүрү 2030 сылга диэри уһатарга эттэ. Элбэх оҕолоох дьиэ кэргэн өйөбүлэ Саха сиригэр социальнай бэлиитикэ сүрүн соруктарыттан биирдэстэрэ буоларын быһыытынан, бу миэрэ салҕанара ураты суолталаах. «Уһук Илин федеральнай уокурукка оҕо төрөөһүнүн өйүүр эбии миэрэлэр үлэлииллэр. Олор истэригэр - маҥнайгы оҕоҕо икки тиийинэн олоруу алын кээмэйин саҕа биирдэ бэриллэр төлөбүр, ону тэҥэ иккис оҕо төрөөтөҕүнэ, эрэгийиэннээҕи ийэ хапытаала. Бу федеральнай ийэ хапытаалын 30 бырыһыаныгар тэҥнээх. Бу үчүгэй өйөбүл, онон эрэгийиэннэргэ биир идэлээхтэрбэр махтаныахпын баҕарабын», - диэтэ Владимир Путин. Саха сирин дьиэ кэргэттэрэ маннык быһаарыы иһин махтаналлар. «Уһук Илиҥҥэ үһүс оҕо төрөөһүнүгэр үрдэтиллибит өйөбүл миэрэлэрэ салгыы бэриллэр буолаллара үчүгэй. Биһиги дьиэ кэргэммитигэр түөрт кыыс баар: уон түөрт, аҕыс, үс уонна биир саастаахтар. Биһиги өрөспүүбүлүкэбитигэр былырыын Айсен Николаев көҕүлээһининэн, төрдүс уонна онтон кэлэр оҕолорго эмиэ эрэгийиэннээҕи ийэ хапытаала бэриллэр. Кыра кыыспытыгар бу үбү ылбыппыт, ону таһынан «Үйэ оҕолоро» тус сыаллаах хапытаалы, - диэн махтанна элбэх оҕолоох ийэ Цветана Михайлова. Уопсайынан, Уһук Илини салгыы сайыннарыыга саҥа соруктар экэниэмикэни, энэргиэтикэни, тырааныспар инфраструктуратын, дьиэ кэргэн өйөбүлүн, инвестициялары тардыыны уонна дьон олоҕун хаачыстыбатын үрдэтиини хабаллар. «Арассыыйа бэрэсидьиэнэ Владимир Владимирович Путин Уһук Илини сайыннарыы биһиги дойдубут хайа да усулуобуйаҕа бастакы суолталаах соруга буоларын өссө төгүл бигэргэттэ. Бу биһиги итэҕэл мандааппыт. Дойду баһылыгын быһаарыыларын көмөтүнэн, Уһук Илин социальнай-экэнэмиичэскэй сайдыыга инники күөҥҥэ тахсар тэтими көрдөрөр», - диэн Арассыыйа бырабыыталыстыбатын бэрэссэдээтэлин солбуйааччы - Арассыыйа бэрэсидьиэнин Уһук Илин федеральнай уокурукка боломуочуйалаах бэрэстэбиитэлэ, ВЭФ бэлэмнэнии уонна ыытыы тэрийэр кэмитиэтин бэрэссэдээтэлэ Юрий Трутнев бэлиэтээтэ. Сүрүн соруктартан биирдэстэринэн Трансарктическай тырааныспар көрүдүөрүн сайыннарыы буолар. Бэрэсидьиэн муора пуортарын, ол иһигэр Саха сиригэр Тиксии пуордун, саҥардар, хотугу логистика көдьүүһүн үрдэтэр уонна аныгы тырааныспар инфраструктуратын тэрийэр наадатын тоһоҕолоон бэлиэтээтэ. Бу хайысха сайдыыта өрөспүүбүлүкэ Арктика оройуоннарыгар, хотугу таһаҕаһы таһыыга уонна саҥа экэнэмиичэскэй бырайыактары олоххо киллэриигэ ураты суолталаах. Владимир Путин энэргиэтикэҕэ туспа болҕомтотун уурда. Уһук Илин экэниэмикэтин сайдыыта саҥа энэргиэтикэ кыамталарын уруккутааҕар инники күөҥҥэ тутан оҥорууну уонна инфраструктураны саҥардыыны ирдиир. Саха сиригэр бу сорук нэһилиэнньэлээх пууннары уотунан хааччыйыыны кытта ситимнээх, ону тэҥэ бөдөҥ бырамыысыланнас уонна инфраструктура бырайыактарын олоххо киллэриини. Биир сүрүн соругунан Уһук Илиҥҥэ бэйэтигэр айылҕа баайын оҥорон таһаарыыны сайыннарыы буолуоҕа. Туһаайыытыгар бэрэсидьиэн Саха сиригэр баар кокстанар чох Элгэтээҕи учаастагын санатта. Сорук - баай ресурсалаах база сайдыыта үрдүк эбиллиилээх бородууксуйаны оҥорон таһаарыыны, саҥа тэрилтэлэри уонна эрэгийиэннэргэ үлэ миэстэлэрин тэрийиини кытта дьүөрэлэһиэхтээх. Уһук Илин куораттарын маастар-былааннарын олоххо киллэрии салҕаныаҕа. Саха сиригэр бу үлэ Дьокуускайы уонна Нерюнгрины хабар уонна социальнай, хомунаалынай, тырааныспар уонна куорат инфраструктуратын кэлим саҥардыыны көрөр. Инвестициялары тардыы эйгэтигэр эмиэ саҥа соруктар турдулар. 2027 сыл тохсунньу 1 күнүттэн Уһук Илиҥҥэ урбааҥҥа биир кэлим чэпчэтиилээх эрэсиими киллэрии былааннанар. Бу инвестордар үлэлэрин усулуобуйатын ордук өйдөнүмтүө оҥорорго уонна саҥа бырайыактары саҕалыырга көҕүлүүр аналлаах. Саха сиригэр бу бырамыысыланнаһы, энэргиэтикэни, тырааныспар инфраструктуратын, Арктика зонатын уонна урбааны сайыннарарга эбии кыахтары биэрэр. Өрөспүүбүлүкэ аҕа баһылыга Айсен Николаев федеральнай киин көҕүлээһиннэрэ эрэгийиэн инники күөҥҥэ тахсар сайдыытын стратегиятыгар толору сөп түбэһэллэрин уонна дьон олоҕун хаачыстыбатын үрдэтиигэ үлэлииллэрин бэлиэтээтэ. Владимир Путин креативнай экэниэмикэ кэскиллэригэр болҕомтотун уурда. Туһаайыытыгар айар урбааны сайыннарыы инфраструктуратыттан холобур быһыытынан Саха сиринээҕи «Үлэ кыбаарталын» бэлиэтээтэ. Креативнай индустриялары сайыннарыы экэниэмикэни диверсификациялыыр уонна эдэр дьоҥҥо саҥа кыахтары арыйар хайысхалартан биирдэстэринэн ааҕыллар. Бэрэсидьиэн ыйбыт соруктара Уһук Илин сайдыытын саҥа түһүмэҕин төрүтүнэн буолуохтаахтар. 2036 сылга диэри макро-эрэгийиэн үүнүүтүн инники күөҥҥэ тахсар тэтимин оннунан хаалларарга, инфраструктураны уонна экэниэмикэ аныгы салааларын сайыннарарга, инвестициялары тардарга уонна дьон олороругар, үлэлииригэр табыгастаах усулуобуйалары тэрийэргэ сорук турар. |
Уһун үйэлэнии институтун эспиэрдэрэ быһаарбыттарынан, туһалаах аһылыктан да турар күннээҕи рацион, киһи организмын наадыйыытын барытын толорбот. Ол курдук доруобуйаҕа аһылык хаачыстыбата эрэ буолбакка, арааһа эмиэ улахан суолталаах.
Хас биирдии хортуоппуй, фрукта, отон, куруппа, бобовай, эриэхэ эбэтэр күөх үүнээйи бары тус-туспа клетчаткалаахтар, полифеноллаахтар, битэмииннээхтэр, атын да биоактыыбынай веществолардаах.
Итилэртэн аһылык клетчаткалара, полифеноллара куртахха, синньигэс оһоҕоско буспаттарын кэриэтэ. Арай суон оһоҕоско тиийэн, онно олохсуйан олорор бактыарыйаларга, тэллэйдэргэ, вирустарга ас буолаллар. Аһыыр аскар төһөнөн үүнээйи арааһа элбэх да, соччонон ити олорооччулар көрүҥнэрэ элбээн, байан иһэллэр итиэннэ иһиҥ-үөһүҥ үчүгэй туруктаах буоларын хааччыйаллар. Ол курдук бактыарыйалар бары араас-араас веществолары оҥорон таһаараллар. Онно сорохтор эбиэс клетчаткатын хото туһаналлар, сорохтор — бобовайдары, сорохтор — дьаабылыканы, отоннору эбэтэр хаппыыстаны. Онон аһылык элбэх көрүҥэ араас микроорганизмнары тутарга көмөлөһөр.
Оттон сылы сыллаан наар биир аһылыктаах дьоҥҥо оһоҕоско баар микроорганизмнарын көрүҥэ аччаатар аччаан барар. Үгүс чинчийии көрдөрбүтүнэн, оһоҕос "олохтоохторун" көрүҥэ төһөнөн араас, элбэх буолаллар да, соччонон веществолар атастаһыылара күүскэ барар, ааспат-арахпат баспалыанньа хаптайар, иммунитет бөҕөргүүр.
Онон эспиэрдэр күннээҕи аһылыкка үүнээйилээх аһылык элбиирин туруорсаллар. Ол эбэтэр "нэдиэлэҕэ 30 тус туһунан үүнээйи аһылык" сиэниллиэхтээх. Манна оҕуруот аһа, фрукта эрэ буолбатах, отоннор, күөх үүнээйилэр, бобовайдар, тэллэйдэр, ферментированнай оҕурсуулар, оннооҕор исписэссийэлэр кытта киириэхтэрин сөп. Холобур, хаппыыста, фасоль араас көрүҥнэрэ тус-туспа үүнээйи быһыытынан ааҕыллаллар.
"Арай клетчатка ахсаанын олус түргэнник улаатыннарымаҥ, — диэн сүбэлииллэр эспиэрдэр. — Саҥа бородууктаны аргыый аҕай киллэрэр наада, ону кытта элбэхтик ууну иһиэхтээххин.
|
Дьокуускайга балаҕан ыйын 9 күнүгэр Арассыыйа Дьоруойа, «Сунтаар» диэн ыҥырыллар ааттаах Дмитрий Егоровка уонна кини бойобуой доҕоро «Ронин» диэн ааттаах Николай Романовка пааматынньыгы арыйдылар. Мемориал Курашов уонна Поярков уулуссаларын быһа охсуһууларыгар турда. Арыллыы сиэригэр-туомугар байыаннай сулууспалаахтар төрөппүттэрэ, чугас дьонноро, бииргэ сулууспалаабыттара, бойобуой дьайыылар бэтэрээннэрэ уонна анал байыаннай дьайыы кыттыылаахтара, уопсастыбанньыктар уонна устудьуоннар кытыннылар. Дмитрий Егоров Сунтаар улууһун Арыылаах нэһилиэгэр төрөөбүтэ, улааппыта. 2022 сыллаахха баҕа өттүнэн анал байыаннай дьайыы буола турар сиригэр барбыта уонна Чуумпу Акыйаан флотун 155-с гвардейскай туспа муора пехотатын батальонун ытааччытынан сулууспалаабыта. Николай Романов Чурапчы улууһун Мырыла сэлиэнньэтигэр төрөөбүтэ, Нам улууһугар олорбута уонна үлэлээбитэ. 2023 сыллаахха эмиэ баҕа өттүнэн анал байыаннай дьайыыга барбыта. «Сунтаар» уонна «Ронин» сулууспалыы сылдьан билсибиттэрэ, бойобуой табаарыстар уонна чугас доҕоттор буолбуттара. Тиһэх бойобуой сорудахха бииргэ барбыттара уонна биир күн өлбүттэрэ. Хорсун быһыытын, байыаннай иэһин толоро сылдьан көрдөрбүт эр санаатын иһин, Арассыыйа бэрэсидьиэнин 2023 сыл алтынньы 9 күнүнээҕи ыйааҕынан, Дмитрий Егоровка өлбүтүн кэнниттэн Арассыыйа Федерациятын Дьоруойун аата иҥэриллибитэ. Николай Романов өлбүтүн кэнниттэн «Мужество» уордьанынан наҕараадаламмыта. Өрөспүүбүлүкэ аҕа баһылыга Айсен Николаев уонна бырабыыталыстыба ааттарыттан тэрээһин кыттыылаахтарыгар СӨ бырабыыталыстыбатын бэрэссэдээтэлин солбуйааччы Анатолий Семёнов тыл эттэ. «Мин Ил Дархан уонна бырабыыталыстыба аатыттан дьоруойдар төрөппүттэригэр, бары чугас аймахтарыгар, биир дойдулаахтарбытыгар, маннык хорсун уолаттары иитэн таһаарбыт учууталларга махталбын тиэрдиэхпин баҕарабын. Бары бииргэ сулууспалаабыт дьоҥҥо, бойобуой дьайыылар бэтэрээннэригэр биһиги дойдубут интэриэһин көмүскүүргүт иһин махтанабын. Пааматынньык үөрэх кыһаларын аттыгар турда, мин саныахпар, бу сир - эдэр ыччакка ананар. Кинилэр көрүөхтээхтэр, өйдүөхтээхтэр: биһиги уолаттарбыт туох иһин өлбүттэрин, кинилэртэн хорсун быһыы холобурун ыллыннар. Биһиги дьыалабыт кырдьыктаах, биһиги кыайыахпыт!» - диэтэ Анатолий Семёнов. Тэрээһиҥҥэ Дмитрий Егоров уонна Николай Романов бойобуой доҕордоһууларын ордук чорботон бэлиэтээтилэр. Кинилэр бойобуой доҕордоһуулара тиһэх сорудахтарыгар диэри салҕаммыта. «Дмитрий уонна Николай бииргэ сулууспалаабыт эрэ дьон буолбатахтар, кинилэр чугас доҕоттор этилэр. Тиһэх бойобуой сорудахха бииргэ барбыттара, ол эрээри онтон төннүбэтэхтэрэ. Биһиги олохторун толук уурбут дьоруойдарбытын умнубаттарыгар махтанабыт уонна олус үөрэбит», - диэбитэ Арассыыйа Дьоруойун аҕата Николай Алексеевич. Тэрээһин кыттыылаахтара пааматынньыкка сибэкки уурдулар. Арассыыйа Дьоруойа Дмитрий Егоровы, Николай Романовы уонна байыаннай иэһин толоро сылдьан охтубут байыастары барыларын кэриэстээн, биир мүнүүтэ чуумпуруунан ахтан-санаан аастылар. Саҥа мемориал дьоруойдар хорсун быһыыларын уонна бойобуой бырааттыы сыһыаннарын үйэтитэр соруктаах. Үөрэх кыһаларын аттыгар турара ураты суолталыыр - бу эдэр көлүөнэ Ийэ дойдуну көмүскээччилэр олохторун уонна хорсун быһыыларын билэр миэстэлэрэ буолуоҕа. Саха Өрөспүүбүлүкэтин Ил Дарханын уонна бырабыыталыстыбатын пресс-сулууспата. Хаартыска: УлусМедиа. |
Дьокуускай куорат борокуратуурата биир дьахтарга тэриллибит холуобунай дьыала буруйдуур аактатын бигэргэттэ. Бу дьахтар РФ Холуобунай кодексын 322.3 ыстатыйатынан (атын дойду гражданинын сымыйанан учуокка туруоруу) буруйданар.
Холуобунай дьыала матырыйаалларынан, бу дьахтар харчыга ымсыыран, бэйэтин дьиэтигэр 8 омук киһитин бырапыыскалаабыт. Биллэн турар, бу дьону дьиэтигэр олордубатах, харчыларын эрэ ылбыт.
Силиэстийэ кэмигэр суут дьахтар дьиэтин «хатыырга» уурда. Суут быһаарыы ылыннаҕына, дьиэни былдьыыр туһунан боппуруос көрүллэр.
Холуобунай дьыаланы борокуруор суукка ыытта. Бу туһунан СӨ Борокуратуурата иһитиннэрэр.
|
27 саастаах Денис Кинкалак доҕотторун кытта Владивостокка сынньана тиийбит. Доҕоро Сергей атырдьах ыйын 31 күнүгэр, Денис аттыгар сылдьыбытын RT-га маннык кэпсээбит:
—Биһиги маяктан кытылынан баран испиппит. Эмискэ дьахтар хаһыытыырын истибиппит. Оҕото долгуҥҥа оҕустаран ууга былдьатан эрэрин быыһатаары көмө көрдүүрэ. Онно киирээти тута дириҥ. Мин ыксаан, уолуйан хаалбытым, аны сатаан харбаабаппын. Эргийэ биэрбитим, доҕорум Денис миэхэ суумкатын, төлөпүөнүн быраҕаат, ууга ыстанна. Кини харбаан тиийэн оҕоҕо биэрэк диэки барарыгар этэрин, уоскутарын чуолкайдык истибитим.
Сергей төһө да күүстээх, улахан долгуннааҕын иһин, Денис кыыһы кытыл диэки үтэйбитин этэр:
—Биир табаарыспын кытта оҕону таһааран ийэтигэр туттарбыппыт. Көрүҥүнэн алта-сэттэ саастаах. Арай, эргиллибитим, Дениһи күүстээх долгун кытылтан хайыы-үйэ 25 миэтэрэ ыраахха илдьибит этэ. Кини күүһэ-уоҕа эстибитин, кыайан тахсыбат кыахтаммытын хаһыытаан эппитэ. Сэниэ ыла түһээри, ууга тиэрэ эргийэн, көхсүнэн сыппыта. Биһиги сүүрэ сылдьан оҥочолоох дьону көмөҕө ыҥыра сатаабыппыт, МЧС төлөпүөннээбиппит. Онтон көрбүтүм… Денис суох, көстүбэт. Онно биэс чааһы быһа сылдьыбытым, быыһааччылар кинини булбатахтара. Олус улахан шторм саҕаланна диэбиттэрэ.
Кини Денистэн улаханнык соһуйбут, хорсун быһыыны оҥорбут дьоруой диэн этэр:
—Кини повар-кондитер, наһаа бэрээдэктээх. Парашютунан ыстаныы эбэтэр туох эрэ кутталлаах, экстрим, киниэнэ буолбатах этэ. Биһиги бары ыксаан, уолуйан хаалбыт кэммитигэр, кини наһаа түргэнник көмө наада буолбутун, тугу гыныахтааҕы өйдүү охсубут этэ.
Дениһи билигин да була иликтэр. Көрдүүр этэрээт кыттыылаахтара оҕону быыһаабыт хорсун санаалаах киһини наҕараадаҕа түһэрэргэ этии киллэрбиттэр.
|
Нерюнгригэ полицейскайдар лицензията суох арыгыны атыылыыр урбаанньыты туттулар.
ИДьМ экэниэмикэҕэ куттал суох буолуутун, хоруупсуйаны утары охсуһуу отделын үлэһиттэрэ арыгыны сокуоннайа суохтук атыылыыр урбаанньыты туттулар. 57 саастаах дьахтар бэйэтин маҕаһыыныгар лицензия болдьоҕо тахсыбытын да кэнниттэн, арыгытын атыылыы олорбут. Маҕаһыыҥҥа тиийэн, полицейскайдар 1090 бытыылка буокканы, ханньааҕы, вискины уонна 147 көрүҥ арыгыны буллулар.
Бу арыгы уопсайа 600 тыһыынча солкуобайтан тахса сыаналаах диэн быһаарыллыбыт. Билигигн бэрэбиэркэ ыытылла сылдьар. Ол түмүгүнэн процессуальнай быһаарыы ылыллыаҕа.
Урбаанньыт дьайыытыгар РФ Холуобунай кодексын 171.3 ыстатыйатынан («Сокуоннайа суохтук этиловай испиири, арыгыны, испиирдээх бородууксуйаны, табаҕы, никотиннаах бородууксуйаны оҥоруу, эбэтэр, батарыы») буруйу оҥоруу көстөр диэн ИДьМ пресс-сулууспата иһитиннэрэр. Салгыы суут быһаарыаҕа.
|
Бүгүн киэһээ 18:00 чаастааҕы иһитиннэриини көрүҥ.
АО «Саханефтегазсбыт»Дьокуускайга АИ-92, АИ-95 уонна дизтопливо. Харчынан уонна каартанан. Биир тырааныспарга лимиит 20 л диэри. Сапыраапкалана барааччыларга: А-С № 1: Михаил Николаев проспега, 19/1а А-С № 6: Жатай, суол быһа охсуһуута, 1 А-С № 1401 ОПТИ: Маҕан, суол быһа охсуһуута, 1 А-С № 51: 50 лет Советской Армии, 49б А-С № 62: Хатыҥ Үрэх, 4 км, 8а АО НК «Туймаада-Нефть» Болҕомтоҕутугар ылыҥ. АИ-92, АИ-95 А-С ситимнэригэр сарсыҥҥыттан сөргүтүллэр. Дизтопливо: А-С ситимнэригэр хааччаҕа суох. ООО «СибОйл» САҤА ААДЫРЫСТАР БААЛЛАР (бэнсиин кээмэйэ хааччахтаах) Харчынан уонна каартанан, биир тырааныспарга 20 л диэри: АИ-95: Бүлүүлүүр суол, 6 км, 19 АИ-95: А-С, Окружной шоссе, 4 км. АИ-95 Окружной суолга, 4/2я АИ-92: Покровскайга А-С АИ-95: А-С, Покровскайдыыр суол, 4 км (сарсыҥҥыттан сөргүтүллэр) ООО «Сервис Ойл» АИ-92: Покровскайдыыр суол, 5 км, 2Б (сарсыҥҥыттан сөргүтүллэр) Суһал ыстаап. МАКС |